តើអ្នកចង់ស្វែងរកពីអ្វី?
គ្រាន់តែវាយពាក្យគន្លឹះរបស់អ្នកនៅទីនេះ ដើម្បីស្វែងរកទំព័រ ព័ត៌មាន ឬព្រឹត្តិការណ៍
ក្នុងសេចក្តីណែនាំរបស់ក្រសួងសុខាភិបាលស្តីពីការការពារការចម្លងវីរុសកូវីដ-១៩ ក្នុងកំលុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលចុះហត្ថលេខាដោយលោក ម៉ម ប៊ុនហេង បានអំពាវនាវសារជាថ្មី ដល់សារធារណជន ក្រសួងពាក់ព័ន្ធ អាជ្ញាធរថ្នាក់ក្រោមជាតិ និងប្រជាពលរដ្ឋទាំងអស់ បន្តចូលរួមទប់ស្កាត់ការចម្លងកូវីដ-១៩ នៅក្នុងសហគមន៍ដោយទាំងអស់គ្នាត្រូវតែបន្តអនុវត្តតាមការណែនាំរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងការណែនាំរបស់ក្រសួងសុខាភិបាលដែលបានធ្វើជារឿយៗ។
លោក ម៉ម ប៊ុនហេង បញ្ជាក់ថា ប្រជាពលរដ្ឋបន្តអនុវត្ត ដោយការបង្កើនការប្រុងប្រយ័ត្នខ្ពស់ ជាពិសេសអនុវត្តឱ្យបានខ្ជាប់ខ្ជួន និងឱ្យបានគ្រប់ៗគ្នានូវវិធានការ៣ការពារ (ពាក់ម៉ាស់ លាងដៃឱ្យញឹកញាប់ និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង) និង៣កុំ (កុំទៅកន្លែងមានមនុស្សច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា) និងត្រូវបន្ដអនុវត្តនូវគោលការណ៍ណែនាំសំខាន់ៗ ក្នុងអំឡុងពេលពិធីបុណ្យអុំទូក បណ្តែតប្រទីប និងសំពះព្រះខែនេះ។
បើទោះជារាជរដ្ឋាភិបាលបានសម្រេចមិនរៀបចំព្រះរាជពិធីអុំទូក បណ្ដែតប្រទីប សំពះ ព្រះខែ និងអកអំបុក ថ្នាក់ជាតិមែន ប៉ុន្តែរាជរដ្ឋាភិបាលកម្ពុជា បានសម្រេចឱ្យឈប់សម្រាកក្នុងឱកាសនេះ ខណៈដែល ខេត្ត ក្រុងមួយចំនួនខ្លះបានរៀបចំពិធីបុណ្យអុំទូក ជាបន្តបន្ទាប់ដែលមានការជួបប្រជុំគ្នាក្នុងពិធីនោះផងដែរ៕