បើតាមក្រសួងសុខាភិបាល នៅថ្ងៃទី៣១ ខែតុលា ឆ្នាំ២០២២នេះ បានជូនព័ត៌មានស្ដីពីការស្រាវជ្រាវរកឃើញផលិតផលឈោ្មះ YONG LIANG (យ៉ុង លាំង) មានសារធាតុឱសថសម័យ DICLOFENAC SODIUM បន្ទាប់ពីក្រសួងបានទទួលព្រឹត្តិប័ត្រវិភាគគុណភាពពីមជ្ឈមណ្ឌលជាតិពិសោធន៍សុខាភិបាល ដែលបញ្ជាក់ពីផលិតផលឈ្មោះ YONG LING (យ៉ុងអាំង) គ្មានលេខបញ្ជីកា និងមានសារធាតុឱសថសម័យ DICLOFENAC SODIUM ដែលសារធាតុនេះ ត្រូវប្រើប្រាស់ក្នុងកម្រិតច្បាស់លាស់ មានរយៈពេលកំណត់ក្នុងការប្រើ និងមានការប្រុងប្រយ័ត្ន ហើយមានបុគ្គលមួយចំនួនមិនអនុញ្ញាតឱ្យប្រើប្រាស់ទៀតផង។
ជាមួយនឹងគ្នានេះ ក្រសួង ក៏បានប្រាប់ដល់ប្រជាពលរដ្ឋទាំងអស់ មិនត្រូវទិញ និងប្រើប្រាស់ផលិតផល ឈ្មោះ YONG LIANG (យ៉ុង លាំង) នេះឡើយ ព្រោះផលិតផលនេះអាចបណ្តាលឱ្យប៉ះពាល់ដល់សុខភាពធ្ងន់ធ្ងរ ឬឈានដល់ការបាត់បង់អាយុជីវិត។
ជាងនេះទៅទៀតបន្ទាប់ពីការផ្សព្វផ្សាយសេចក្តីជូនព័ត៌មានផលិតផលខាងលើនេះរួចហើយ បើសិនមានម្ចាស់គណនីបណ្តាញសង្គមហ្វេសប៊ុក និងជនពាក់ព័ន្ធណាមួយនៅតែបន្តនាំចូល ចែកចាយ ឬផ្សព្វផ្សាយលក់ ផលិតផលខាងលើនេះជាបន្តទៀត នឹងត្រូវទទួលទោសបញ្ញត្តិតាមច្បាប់ជាធរមាន។
ក្នុងករណីបងប្អូនប្រជាពលរដ្ឋបានជួបប្រទះឃើញជនណាកំពុងនាំចូល ចែកចាយ ឬលក់ផលិតផល ឈ្មោះ YONG LIANG (យ៉ុង លាំង) ខាងលើនេះ សូមប្រញាប់ផ្តល់ព័ត៌មាន ឬត្រូវការព័ត៌មានបន្ថែមពី នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង សូមទំនាក់ទំនងតាមរយៈលេខទូរសព្ទ៖ ០១២ ៣៥៥ ១៦១, ០១១ ៥៧៤ ៧៨៧, ០១២ ៩៨៣ ៣៣៤, ០១៧ ៦០៦ ៦៧០, ០១៧ ៨៦៦ ៧៦០។ នេះបើតាមការបញ្ជាក់ពីក្រសួងសុខាភិបាលនៃព្រះរាជាណាចក្រកម្ពុជា៕