តើអ្នកចង់ស្វែងរកពីអ្វី?
គ្រាន់តែវាយពាក្យគន្លឹះរបស់អ្នកនៅទីនេះ ដើម្បីស្វែងរកទំព័រ ព័ត៌មាន ឬព្រឹត្តិការណ៍
លោក ហឿង ហុន អ្នកលក់បបរតាមរទេះមួយរូបក្នុងសង្កាត់ចោមចៅ១ បានប្រាប់ MJQTV ថាមុននឹងរៀបចំបបរ លោកបានលាងសម្អាតសាច់និងអង្ករប្រកបដោយអនាម័យ ព្រមទាំងបានវាស់គ្រឿងផ្សំតាមចំនួនអង្ករ និងសាច់ដែលត្រូវបបរ ។ លោកបន្តថា ពេលដែលលោកចាប់ផ្ដើមចេញលក់ រទេះរបស់លោកគឺត្រូវតែស្អាតជានិច្ចជាពិសេសគឺកន្លែងដែលត្រូវដាក់សាច់ គ្រឿងដែលបានចម្អិនហើយ គឺមិនឱ្យមានធូលីហុយចូលនោះទេដោយលោកបានធ្វើជាទូកញ្ចក់រួចដាក់សាច់ក្នុងនោះ។
ក្រុមអ្នកលក់ចំណីអាហារតាមរទេះរុញ និងម៉ូតូសណ្ដោង ភាគច្រើនលក់តាមផ្លូវដែលប្រឈមនឹងដីហុយ និងផ្សែងយានយន្តផ្សេងៗ។
អ្នកលក់នំបញ្ចុកតាមរទេះរុញម្នាក់គឺអ្នកស្រី ជីម រី បានប្រាប់ MJQTV ថាបើទោះជាអ្នកស្រីមិនមានហាងលក់ត្រឹមត្រូវ ឬធំដំក្តី ប៉ុន្តែអនាម័យគឺជាអ្វីដែលអ្នកស្រីយកចិត្តទុកដាក់ព្រោះថា រសជាតិសំខាន់ម្យ៉ាង ប៉ុន្តែប្រសិនបើការស្ល និងទុកដាក់បន្លែសម្រាប់ជាល្បោយនំបញ្ចុកនោះមិនមានអនាម័យនោះ គឺមិនអាចទាក់ទាញអតិថិជនបានយូរអង្វែងនោះទេ។
បើតាមអ្នកស្រី ជីម រី មិនត្រឹមតែលក់នំបញ្ចុកតាមរទេះរុញប៉ុណ្ណោះទេ ជារឿយៗមានអតិថិជនមកហៅអ្នកស្រីទៅចម្អិនសម្រាប់កម្មវិធីផ្សេងៗរបស់គេទៀតផង ដោយអតិថិជនជឿទុកចិត្តលើអនាម័យនិងរសជាតិ។
ករណីនេះ អ្នកជំនាញសុខភាពសាធារណៈគឺអ្នកឧកញ៉ា វេជ្ជបណ្ឌិត គួច ម៉េងលី មានប្រសាសន៍ថា មិនមែនមានតែអាហារដែលលក់តាមចិញ្ចើមផ្លូវទេដែលខ្វះអនាម័យ សូម្បីតែតាមហាងអាហារមួយចំនួនក៏មិនបានយល់ដឹងពីបញ្ហាអនាម័យនោះដែរ។ លោកបន្តថា ប្រជាពលរដ្ឋខ្មែរភាគច្រើនមិនសូវឱ្យតម្លៃទៅលើអនាម័យ។ លោកបន្ថែមថា៖«ការញ៉ាំចុកហុយដីធ្លី ប្រើប្រាស់ប្រេង(ប្រេង ឬខ្លាញ់ សម្រាប់ចម្អិន)ដែលមិននាំឱ្យសុខភាពល្អ នាំឱ្យគាំងបេះដូង នាំឱ្យខូចសសៃឈាម ហើយម្ហូបអាហារដែលប្រើប្រាស់ប្រៃ និយាយរួមសុទ្ធតែបញ្ហាដែលប៉ះពាល់ដល់ការឡើងឈាម ការកកស្ទះសសៃឈាម ការឡើងខ្លាញ់ក្នុងសសៃឈាម ធ្វើឱ្យប៉ះទង្គិចទៅដល់ទឹកនោមផ្អែម ប៉ះពាល់ទៅដល់ការគាំងបេះដូង ស្ត្រូប ស្លាប់មួយចំហៀងខ្លួន »។
ករណីនេះ អ្នកឧកញ៉ា វេជ្ជបណ្ឌិត គួច ម៉េងលី ជំរុញឱ្យអាជ្ញាធរមានសមត្ថកិច្ចចុះពិនិត្យជាឲ្យបានត្រឹមត្រូវ និងជាប្រចាំ៕